नामवंत कवींची बहारदार काव्यमैफिलही
ठाणे । प्र्रतिनिधी
साहित्यातील विविध प्रवाहांची दखल घेतानाच कालानुरुप घडामोडींचेही प्रतिबिंब कथासाहित्यातून उमटवणारा महाराष्ट्र दिनमानचा पहिला दिवाळी अंक शनिवार, 3 नोव्हेंबर, 2018 रोजी गडकरी रंगायतनच्या हिरवळीवर प्रकाशित होणार आहे.उद्योग क्षेत्रातील आघाडीचे नाव रमण खुराणा, अध्यक्ष ग्लोबल पंजाबी असोसिएशन, उपाध्यक्ष इंडियन मर्चंट्स चेंबर, नवी मुंबई चॅप्टर, कलागुणांची पाठराखण करणार्‍या अपूर्वा प्रॉडक्शनचे अध्यक्ष सुमुख वर्तक, वृत्तपत्रांचे जुनेजाणते ज्येष्ठ वितरक अरविंद दातार, डॉ. अनंत देशमुख आणि कविवर्य आप्पा ठाकूर, अशोक बागवे, अरुण म्हात्रे, भगवान निळे, मंगेश विश्वासराव व देवीदास सोनावणे यांच्या उपस्थितीत महाराष्ट्र दिनमान दिवाळी अंकाचा हा प्रकाशन सोहळा दुपारी साडे चार वाजता होत आहे.
प्रकाशन सोहळ्याच्या निमित्ताने नामवंत गझलकार आप्पा ठाकूर, अशोक बागवे, अरुण म्हात्रे, भगवान निळे, मंगेश विश्वासराव व देवीदास सोनावणे अशा रसिकप्रिय कवीश्रेष्ठांची एक बहारदार काव्यमैफिलही रंगणार आहे. कर्जत ते मुंबई आणि पनवेल ते पालघर परिसरातील रसिक वाचक या सोहळ्यासाठी अगत्याने उपस्थित राहाणार असून, हा कार्यक्रम सर्वांसाठी खुला आहे.
महाराष्ट्र दिनमानच्या दिवाळी अंकात यंदा साहित्य फराळावर भर देण्यात आला आहे. इतिहास ते वर्तमान काळाशी सुसंगत लेख, रुपेरी पडद्याचा रंगीत प्रवास, जपानला प्रेरणा देणारी कवयित्री असे विविध लेख या अंकात आहेत. त्याचप्रमाणे ग्रामीण भागातील नव्या दमाच्या कथाकारांच्या आशयगर्भ कथा, सोशल मीडियाचे दुष्परिणाम दर्शवणार्‍या कथा, कविता, व्यंगचित्रे अशा वाचनीय साहित्याने अंक परिपूर्ण आहे. वाचकांचे दिवाळी बजेट बिघडू नये याची काळजी घेत अवघ्या 70 रुपयांत हा अंक ठाणे, मुंबईसह सर्वत्र रविवारपासून उपलब्ध होणार आहे.याच वेळी दै. जनादेश आणि रणांगण या दिवाळी अंकांचेही प्रकाशन होणार आहे. सर्व रसिक वाचकांना या प्रकाशन सोहळ्यासाठी अगत्याचे निमंत्रण आहे.
No comments:
Post a Comment